Golaha deegaanka Tuulo lagu magacaabo Sunderbari oo ku taal wadanka Hindiya ayaa ku soo rogay haweenka ku dhaqan deegaankaasi inaan lagu arki karin iyagoo isticmaalaya telefoonada gacanta ee Mobile-ka, taasi oo ay u cuskadeen in telefoonadaasi ay ku yihiin ceeb iyo waji gabax bulshada.
Tuulada Sunderbari oo ka tirsan gobolka Patna ee waqooyiga bari ee dalka Hindiya waa deegaan ay ku badan yihiin Muslimiinta wadanka Hidniya, waxaana deegaankaasi uu 385 Km u jiraa magaalo madaxda gobolkaasi ee Pihar.
Wakaalada wararka Reuters oo warkan faafisay waxay ka soo xigatey maamulka deegaankaasi in telefoonada Mobile-ka ay keeneen dhibaatooyin ay ka mid yihiin in gabdho rag ay la baxsadeen, iyadoo raali aanay ka aheyn waalidkood, in ay kordhaan arimaha mucaashiqiinta iyo hasaawaha arintaasi oo uu si wqeyn u sahlay mobile-da.
“Waxay arintan mar kasta nagu noqotaa waji gabax, marka xili kasta la iswyadiiyo yaa la masaafeystey taasi waxay ku tahay bulshada sumcad xumo” ayuu yiri Manuwar Alam, oo madax ka ah gudi loo soo saarey inay si awood ah u dhaqan galiyaan amarada ku jihaysan in haweenku aanay isticmaali Karin mobile-da.
Go’aanka ka soo baxay golaha deegaanka wuxuu ganaax ku soo rogayaa haweenaydii lagu arko iyadoo isticmaalaysaa mobile, waxaana loo kala qaaday laba qaybood.
Haweenaydii la qabo ee lagu arko iyadoo mobile isticmaalaysaa waxaa la ganaaxayaa 2000 oo Ruppee oo ah lacagta wadanka Hindiya oo u dhiganta 36 doolar, laakiin ganaaxu wuxuu ku badan yahay haweenka aan la qabin iyadoo dusha loo saarayo ganaax dhan 10 kun oo Rupee oo u dhiganta 180 doolar.
Manuwar Alam oo sii faahfaahinayey go’aanka ay ka qaateen isticmaalka mobile-da ee haweenka wuxuu sheegay in ay kordheen arimaha haasawaasha iyo gabdhaha ka cararaya guryahooda, isagoo sheegay in ugu yaraan lix gabdhood ay ka baxsadeen guryahoodii bilihii la soo dhaafay.
“Xitaa haweenka la qabo ayaa ragooda dayacaya, iyadoo taasi ugu wacan tahay rag ay iska heleen khadkad telefoonada, waxaana go’aan ku gaarnay in arintaasi aan xakameyno taasi oo dhibaato sumcad xumo ah ku ah bulshadeenna” ayuu hadalkiisa sii raaciyey Manuwar Alam.
Laakiin go’aankan waxaa la sheegay in maamulka gobolka Patna uu ka biyo diidsan yahay, waxaa sidoo kale soo baxaysa diidmo xoogan ka imaanaysa ururada bulshada deegaankaasi, kuwaasi oo sheegay in arintan ay dhibaato ku tahay madaxbanaanida iyo shakhsiyada qofka.
Ururada haweenka u dhaqdhaqaaqa ayaa ku tilmaamay go’aankan mid ka horimaanaya xuquuqda haweenka, iyagoo sheegay in xitaa hadii haweenaydu u baahato inay la xiriirto ehelkeeda ama ay u baahato gargaar caafimaad in ganaaxaasi uu saameyno.
“Haweenka iyo gabdhuhuba waxay u leeyihiin awood inay naftooda ilaaliyaan, waxaana loo sameeyey Technology-da in laga faa’ideyso balse in la mamnuuco waa lallabo iyo yaq yaqsi” ayay tiri Suman Lal oo ka mid ah dadka go’aankan sida weyn uga soo horjeeda oo ka qayb galayey dood telefishin oo arinkan looga doodayey.
Mohammad Islam oo isaguna arimaha bulshada u dhaqdhaaqa ayaa docdiisa wuxuu sheegay in ay ku tahay ceeb golaha deegaankaasi go’aanka, isagoo xusey inay iska indho tirayaan faa’idada telefoonku leeyahay, iyagoo hal arrin u mamnuucaya.
Mowliid Xaaji Cabdi
